2010年11月11日
遊樂 P.48
月巴氏 - 月巴氏: 以小人之心度(Facebook)君子之腹
撰文：月巴氏 blog：http://fatmoonba.blogspot.com/ email：fatmoonba@yahoo.com.hk like乜 (註：為區別現實中的朋友，和Facebook的「朋友」，文中提及Facebook的「朋友」時一概以「friend」字代替。) 唔記得邊個古人懶勁咁講了句「人生得一知己死無憾矣」，但如果玩得Facebook，而又只得一個friend，唔止遺憾，直頭稱得上羞家。 對比一些竟然坐擁成800幾個friend的friend，得嗰157個friend的我，自然微不足道，但要維繫這157段友誼，原來都好難。最基本的維繫，莫過於遇上friend生日時，自然要講聲happy birthday，即使Facebook有個親切功能，會提示你誰和誰和誰在邊日生日，但不代表你就會時刻留神。我就經常在friend生日過後(好幾日甚或好幾個月)，才記得補上一句「happy birthday」......但那些被我遺忘了生日的friend，依然表現得好friendly，非但不怪罪，還會禮貌地回應一句多謝，或thz...... 在Facebook裡同friend的相處形態，的確跟現實中朋友的很不同。Facebook裡的friend，都表現得好君子，君子得大家都交晒個心出來，當你說了一些開心事時，他們會留言祝福；當你呻了現實生活裡一點點不快事時，他們會叫你「add oil」；即使像無聊兼低俗的我，只在「What's on your mind？」那一格打咗句粗口，一樣會有friend click一click那個「like」。看著有friend(居然)like我那句不帶任何意思的粗口，我感到好窩心。死無憾矣。 當然我也留意到有些friend原來很不夠friend。我生日，連happy birthday都冇句；我留言，回應都唔打番句——OK，唔回應，click個「like」都唔係好蝕底啫，但他們就是連這麼一個「like」，都要同我計。突然我又明白，原來Facebook的friend同特首的下屬一樣，都有親疏之別。 my friend不tag佢老婆 (有幸)add了我的friend都知道，我的profile相只得一隻畫得頗醜的公仔，相簿裡亦都冇乜相，現存的，都是其他friend好心影咗後，再好心地tag埋我的。 以前tag落的就算了，只是近排每逢被朋友影低，自己都會懶語重心長地補上一句：放上Facebook冇問題，但唔該唔好tag我，實際原因連我自己都唔知。我更不明白的是，有些男性friend明明結咗婚，但當見到他同老婆和其他朋友的合照時，人人都有份被tag，係老婆冇份，好似不曾存在咁。是她老婆不想被tag，還是my friend不願別人知道那位就是他的老婆？ 也見過有些(唔太friend的)friend擺了些相，好特別的，統統冇人的，只有她和老公現居的屋企透視，客廳、飯廳、睡房、廁所同工人房，而那個album的title是「My Sweet Home」......OK，收到，我們都知道你住的是house了。於是，friend的留言不是「好靚吖！」，就是「好大喎！」之類的溢美之辭，而我，其實也是留了差不多的說話，只是唔覺意加了些語氣助詞：「Wow，好X大吖，好X靚嘞。」 結果，佢不再把我當friend，在虛空中跟我絕咗交。這個friend，女同學來的，現實中已經不相往來十幾年(而相信在餘生也不會有甚麼往來，喺街撞到甚至會詐見唔到)，只是偶爾間，因誤會而add咗——是的，在我那157個friend之中，的確不乏因誤會而add咗的，明明已經唔熟，只不過見對方是自己某個friend的mutual friend，就順便add埋吧。 事實是，有時當望見某些friend留了句(絕對好廢的)發人深省做人道理，或(完美地唔好笑的)笑話時，真的好有衝動回他一句不禮貌的說話(主要成份是粗口)，但，Facebook的交友之道，同樣存在虛偽之一面，不但不會寸對方，仲會像撞邪般click個「like」。 那一刻，的確嚴重地睇唔起自己。 友誼大同 單拖看《社交網絡》的期間，我想到以上這些。 電影沒錯是根據一本小說改編，不是事實之全部，但原來Facebook創辦人，竟然是這麼一個冇乜朋友的人。而根據性格決定命運的定理，他冇乜朋友的下場某程度上是由他一手促成的。 放下了《奇幻逆緣》那個大歷史壯闊格局，David Fincher僅僅微觀了幾個Facebook關係者幾年之間的恩怨——每個人都曾經天真，每個人都覺得朋友出賣了自己，而不再把朋友視為朋友；每個人同樣覺得自己才是對的一方，而朋友都注定是錯的一方。 唔知邊個啱、邊個唔著，但各人同樣因為令有助世界邁向友誼大同的Facebook，而發了達。 沒有動作，統統文戲，超多對白，但成齣戲一個冷場都冇。 看著最後一幕，男主角望住前女友Facebook而唔知add唔add好時，我在想：原來自己真正想add的，永遠都唔敢add；真心想翻撻的友誼，已成永遠的過去式。
本文章內容之版權由AM730所有。
Alex on iPhone
沒有留言:
張貼留言